मुख्य सामग्रीमा जानुहोस्

आवेदन आह्वान | पहिलो समूह, २०८३/८४

प्रदीप गिरि फेलोसिप | विचार र कर्म

लोकतान्त्रिक मूल्य र सामाजिक रुपान्तरणका लागि प्रदीप गिरि फेलोसिप

प्रदीप गिरि इन्स्टिच्युटको पहल र नेपाली कांग्रेससँगको सहकार्यमा सञ्चालित

अन्तिम मिति
१३ पुष, २०८३ । २९ डिसेम्बर, २०२६
योग्यता
नेपाली नागरिक
आवेदन शुल्क
लाग्दैन
आवेदन फारामतर्फ जानुहोस्
प्रदीप गिरि फेलोसिपको पोस्टर: In ideas. In words. Inspiring generations.

१यो फेलोसिप किन?

स्व. प्रदीप गिरिले आफ्नो पछाडि कुनै गुट, सम्पत्ति वा राजनीतिक विरासतका उत्तराधिकारी छोड्नुभएन। उहाँले दुईवटा संस्कार छोड्नुभयो। उहाँले जीवनभर लेखपढ गर्नुभयो। र, राज्य प्रणालीले किनारामा पारेका मानिसहरूको पक्षमा सधैँ उभिनुभयो।

यो फेलोसिप ती दुवै संस्कारलाई संस्थागत गर्ने प्रयास हो। उहाँको चौथो स्मृति दिवसका अवसरमा भदौ ६, २०८३ मा घोषणा गरिएको फेलोसिप अन्तर्गत पहिलो समूहका लागि यो आवेदन खुला भएको छ।

२के–के खुल्यो

विचार (अनुसन्धान तथा लेखन)

कसका लागि
शोधकर्ता, लेखक, अनुवादक र दस्तावेजीकरणकर्ता
सङ्ख्या
३ जना फेलो
अवधि
१२ महिना
तपाईंले बुझाउने काम
प्रतिवेदन होइन, पूर्ण रूपमा तयार पाण्डुलिपि
तपाईंले पाउने सुविधा
वार्षिक मानदेय तथा आवश्यक अन्य सुविधा। नेपाली कांग्रेस र प्रदीप गिरि इन्स्टिच्युटको अभिलेखमा पहुँच। तोकिएको सम्पादकको मार्गदर्शन। प्रकाशनको सुनिश्चितता।

कर्म (न्याय)

कसका लागि
सक्रिय कानुन व्यवसायी
सङ्ख्या
४ जना फेलो
अवधि
१२ महिना
तपाईंले बुझाउने काम
प्रत्येक फेलोले ५ देखि ६ वटा मुद्दा। डेस्कले वर्षमा कम्तीमा २० वटा मुद्दा, सेवाग्राहीका लागि निःशुल्क।
तपाईंले पाउने सुविधा
वार्षिक मानदेय तथा आवश्यक अन्य सुविधा। मुद्दासम्बन्धी सम्पूर्ण कानुनी तथा प्रशासनिक खर्च। विषम वा दबाबमूलक परिस्थितिमा संस्थागत सुरक्षा तथा कानुनी सहयोग। वार्षिक न्याय प्रतिवेदनको सह-लेखकका रूपमा पहिचान।

निष्ठापूर्ण असहमति निबन्ध पुरस्कार

कसका लागि
आफ्नै पक्षको आलोचना गर्दै निबन्ध प्रकाशित गरेका जोसुकै लेखक
सङ्ख्या
वर्षमा १ पुरस्कार
अवधि
यो फेलोसिप होइन। एक पटक दिइने पुरस्कार हो।
तपाईंले बुझाउने काम
पहिले नै प्रकाशित निबन्ध
तपाईंले पाउने सुविधा
नगद पुरस्कार र सार्वजनिक सम्मान

३विचार | अनुसन्धान तथा लेखन फेलोसिप

विचार विधाले अनुसन्धान, पुस्तक लेखन, अनुवाद र दस्तावेजीकरणमार्फत प्रदीप गिरिको बौद्धिक कर्म र वैचारिक विरासतलाई निरन्तरता दिन्छ। यो विधा अन्तर्गत निम्न चार क्षेत्रमा प्रस्ताव आह्वान गरिएको छ।

  • नेपाली राजनीति, गणतन्त्र र संघीयता। नेपालको राजनीतिक रूपान्तरण, गणतन्त्र र संघीयताको विकास तथा यसका विविध आयामबारे अध्ययन।
  • समावेशिता र सामाजिक न्याय। सीमान्तकृत समुदायका अधिकार, समावेशी लोकतन्त्र र संघीयताको व्यावहारिक सुदृढीकरण।
  • साहित्य, दर्शन र विचारको इतिहास। दर्शन, पूर्वीय तथा पाश्चात्य चिन्तन र राजनीतिक विचारको ऐतिहासिक विश्लेषण।
  • युवा नेतृत्व, नागरिक शिक्षा र लोकतान्त्रिक नवप्रवर्तन। नयाँ पुस्तामा नागरिक चेतना, नेतृत्व विकास र लोकतान्त्रिक अभ्यासको प्रवर्द्धन।

यसै छातामुनि प्रदीप गिरि स्वयंमाथि केन्द्रित विशेष अध्ययन पनि गराइनेछ:

  • प्रदीप गिरि र मधेस। मधेसको अधिकार, पहिचान र राजनीतिमा उहाँको दृष्टिकोण। उहाँको वैचारिक यात्रा र मधेससँगको सम्बन्ध।
  • प्रदीप गिरि: राजनीतिभन्दा पर। उहाँको दार्शनिक, सांस्कृतिक र साहित्यिक व्यक्तित्व।
  • प्रदीप र प्रेम। उहाँको अन्तरंग जीवनी। उहाँका पत्रहरू, उहाँका प्रेमहरू, उहाँको बस्तीपुर र उहाँको बनारस।

बलियो प्रस्तावले एउटा स्पष्ट प्रश्न सोध्छ, स्रोत कहाँ छन् भनेर देखाउँछ, र सुरु गरेको काम तपाईं पूरा गर्नुहुन्छ भन्ने कुरा लेखनको नमुनाबाट प्रमाणित गर्छ। पाण्डुलिपि नेपाली वा अंग्रेजीमा लेख्न सकिन्छ।

४कर्म | न्याय फेलोसिप

प्रदीप गिरिको राजनीति अदालत, प्रहरी कार्यालय र मालपोत कार्यालयजस्ता ठाउँमा पनि परीक्षित हुन्थ्यो, जहाँ सबैभन्दा कमजोर नेपालीहरू राज्यसामु एक्लै उभिन बाध्य हुन्छन्। कर्म विधाले त्यस्ता नागरिकको साथमा कानुन व्यवसायीलाई उभ्याउँछ।

चार जना न्याय फेलो, सबै सक्रिय कानुन व्यवसायी, जसले एक वर्षसम्म कानुनी सहायता डेस्क सञ्चालन गर्नेछन्। प्रत्येक फेलोले जातीय विभेदमा आधारित हिंसा र दुर्व्यवहार, जघन्य अपराध, जग्गा-जमिनसम्बन्धी विवाद, नागरिकताको कागजातबाट वञ्चित गरिएका वा राज्यका सेवाको पहुँचमा अवरोध सामना गरिरहेका दलित तथा सीमान्तकृत समुदायका तर्फबाट पाँचदेखि छवटा मुद्दा सम्हाल्नेछन्। डेस्क मधेश र संघीय राजधानीमा रहनेछ।

कानुनी सहायता डेस्कले:

  • वर्षमा कम्तीमा २० वटा मुद्दा अघि बढाउनेछ, जुन सेवाग्राहीका लागि निःशुल्क हुनेछ। कागजात तथा राज्यका सेवामा पहुँचसम्बन्धी मुद्दा छिटो टुंग्याइनेछन्। दूरगामी प्रभाव पार्न सक्ने केही गम्भीर मुद्दा भने लामो कानुनी लडाइँका रूपमा लडिनेछन्।
  • प्रत्येक मुद्दाको विस्तृत दस्तावेजीकरण गरी व्यक्तिगत पीडालाई सार्वजनिक अभिलेख र प्रमाणका रूपमा स्थापित गर्नेछ।
  • प्रत्येक वर्ष नेपाली भाषामा न्यायमा पहुँचको अवस्था प्रतिवेदन प्रकाशित गर्नेछ।
  • कानुनी लडाइँका क्रममा देखिएका प्रणालीगत र संरचनागत समस्यालाई थप अध्ययनका लागि विचार विधामा पठाउनेछ।

ढिलो भएको न्याय गरिब हुनुको सबैभन्दा ठूलो कर हो। यही कर गरिब र सीमान्तकृत नागरिकले तिर्नु नपरोस् भनेर यो डेस्क क्रियाशील रहनेछ।

५निष्ठापूर्ण असहमति | निबन्ध पुरस्कार

यो फेलोसिप होइन, वार्षिक निबन्ध पुरस्कार हो। आफ्नै पक्ष, संस्था, आन्दोलन वा पेसाको आलोचना गर्दै लेखिएको उत्कृष्ट प्रकाशित निबन्धलाई यो पुरस्कार प्रदान गरिनेछ। नेपाली कांग्रेसका सदस्यले नेपाली कांग्रेसमाथि गरेको आलोचना, अरू पार्टीका सदस्यले आफ्नै पार्टीमाथि गरेको आलोचना, वा पत्रकारले पत्रकारिता क्षेत्रका कमजोरीमाथि गरेको आलोचना यसका उदाहरण हुन्।

यसको उद्देश्य असहमतिलाई विरोधका रूपमा होइन, निष्ठा, आत्मसमीक्षा र लोकतान्त्रिक संस्कारका रूपमा स्थापित गर्नु हो। यस पुरस्कारको मूल्याङ्कन पनि स्वतन्त्र निर्णायक समितिले गर्नेछ।

६कसले आवेदन दिन सक्छ

सबै विधाका लागि

  • नेपाली नागरिक हुनुपर्छ। कुनै दलको सदस्य हुनु वा नहुनुले न बाधा पर्छ, न लाभ पुग्छ।
  • आवेदन शुल्क लाग्दैन। कुनै पनि राजनीतिक नेताको सिफारिस आवश्यक छैन, र त्यस्तो सिफारिसलाई विचार गरिने छैन।
  • एक व्यक्तिले एक विधामा एउटा मात्र आवेदन दिन सक्नेछ।
  • आवेदन दिन नपाउने: प्रदीप गिरि इन्स्टिच्युटका सञ्चालक र कर्मचारी, निर्णायक समितिका सदस्य, र उनीहरूका एकाघरका परिवार।
  • आवेदन दिन नपाउने: कुनै पनि राजनीतिक दलका बहालवाला केन्द्रीय पदाधिकारी।

विचार

  • न्यूनतम शैक्षिक योग्यता तोकिएको छैन। लामो र गम्भीर लेखन पूरा गर्न सक्ने प्रमाण नै मुख्य आधार हो।
  • प्रस्ताव चार क्षेत्र वा तीन विशेष अध्ययनमध्ये कुनै एकभित्र पर्नुपर्छ।
  • १२ महिनाभित्र तयार पाण्डुलिपि बुझाउने गरी समय दिन सक्नुपर्छ।

कर्म

  • नेपाल बार काउन्सिलबाट प्राप्त, बहाल रहेको कानुन व्यवसायी प्रमाणपत्र र कम्तीमा ३ वर्षको सक्रिय वकालत।
  • नेपाल बार काउन्सिलबाट अनुशासनको कारबाही नभएको।
  • डेस्कले समेट्ने जिल्लाहरूमा मुद्दा लिन र सेवाग्राहीसँग उनीहरूकै भाषामा काम गर्न तयार।
  • डेस्कका मुद्दामा सेवाग्राहीबाट कुनै शुल्क नलिन मञ्जुर।

निबन्ध पुरस्कार

  • निबन्ध भदौ ४, २०८२ देखि अन्तिम मितिसम्म पत्रपत्रिका, जर्नल वा स्थापित अनलाइन माध्यममा प्रकाशित भएको हुनुपर्छ।
  • लेखक आफूले आलोचना गरेकै पक्षसँग आबद्ध हुनुपर्छ।
  • नेपाली वा अंग्रेजीमा लेखिएको वा नेपालको अन्य भाषामा, नेपाली वा अंग्रेजी अनुवादसहित।
  • लेखकले आफ्नै निबन्ध पठाउन सक्छन्। अरूको निबन्ध जोसुकैले मनोनयनमा राख्न सक्छन्।

७कसलाई प्राथमिकता

दुवै विधामा निम्न आवेदकलाई प्राथमिकता दिइनेछ:

  • दलित, मधेसी, जनजाति तथा आदिवासी समुदायका आवेदक।
  • महिला आवेदक।
  • काठमाडौं उपत्यकाबाहिरका, विशेषतः दुर्गम तथा सीमान्तकृत क्षेत्रका आवेदक।

प्रदीप गिरिको नाममा स्थापित फेलोसिप पहिले नै पहुँच र आवाज भएका मानिसमा मात्र सीमित भयो भने त्यो यसको मूल उद्देश्यविपरीत हुनेछ। प्राथमिकता लागू हुने तरिका: गुणस्तरको न्यूनतम मापदण्ड पूरा गरेका आवेदनमध्ये प्राथमिकताका आवेदकलाई पहिले छनोट गरिनेछ।

८आवेदन कसरी दिने

अन्तिम मिति
१३ पुष, २०८३ । २९ डिसेम्बर, २०२६
अनलाइन
यसै पृष्ठमा रहेको फाराम भर्नुहोस्। नेपाली कांग्रेसको वेबसाइटले पनि यही फाराममा पुर्‍याउँछ।
इमेल
भरिएको फाराम र संलग्न कागजात एउटै PDF बनाएर pradeepgiriinstitute@gmail.com मा पठाउनुहोस्। विषयमा विधाको नाम र आफ्नो नाम लेख्नुहोस्। उदाहरण: कर्म | सीता पासवान।
कागजमा
खाममा विधाको नाम लेखी सिलबन्दी गरेर वीरगन्ज, जनकपुर वा ललितपुरस्थित प्रदीप गिरि इन्स्टिच्युटको कार्यालयमा बुझाउनुहोस् वा हुलाकबाट पठाउनुहोस्। ठेगाना यस सूचनाको अन्त्यमा छ।
भाषा
नेपाली वा अंग्रेजी। हातले लेखिएको फाराम पनि स्वीकार गरिन्छ।
सहयोग
+९७७-९८४५५२५३७७ मा आइतबारदेखि शुक्रबार, बिहान १० देखि साँझ ५ बजेसम्म फोन वा सन्देश गर्नुहोस्।

सबै आवेदन सिधै प्रदीप गिरि इन्स्टिच्युटको सचिवालयमा पुग्छन्। कुनै पनि राजनीतिक दलले आवेदन बुझ्ने, राख्ने वा छान्ने काम गर्दैन।

के–के बुझाउने

विचार

  • फाराम १
  • २,००० देखि ५,००० शब्दको लेखनको नमुना
  • बढीमा दुई पृष्ठको व्यक्तिगत विवरण
  • नागरिकताको प्रतिलिपि
  • दुई जना सन्दर्भ व्यक्ति

कर्म

  • फाराम २
  • बार काउन्सिलको प्रमाणपत्रको प्रतिलिपि
  • बढीमा दुई पृष्ठको व्यक्तिगत विवरण
  • आफैँले तयार पारेको एउटा कानुनी लिखत, नाम हटाएर
  • नागरिकताको प्रतिलिपि
  • दुई जना सन्दर्भ व्यक्ति

निबन्ध पुरस्कार

  • फाराम ३
  • प्रकाशित निबन्धको प्रतिलिपि वा खुल्ने लिङ्क

९छनोट कसरी हुन्छ

  1. योग्यता जाँच। सचिवालयले आवेदन पूरा छ कि छैन र योग्यता पुग्छ कि पुग्दैन भनेर मात्र हेर्छ। गुणस्तरको मूल्याङ्कन गर्दैन।
  2. निर्णायक समितिको मूल्याङ्कन। विद्वान्, कानुनविद् तथा सार्वजनिक जीवनका व्यक्तित्व सम्मिलित स्वतन्त्र निर्णायक समितिले योग्य सबै आवेदनलाई अङ्क दिन्छ। कुनै पनि राजनीतिक दलको बहालवाला पदाधिकारी निर्णायक समितिमा रहने छैन।
  3. अन्तर्वार्ता। छोटो सूचीमा परेका आवेदकसँग प्रत्यक्ष वा अनलाइन अन्तर्वार्ता हुन्छ। कर्मका आवेदकले मुद्दाको योजनाबारे छलफल गर्छन्।
  4. निर्णय। निर्णायक समितिको निर्णय अन्तिम हुन्छ। आफ्नो व्यक्तिगत वा पेसागत सम्बन्ध भएको आवेदनको मूल्याङ्कनबाट सम्बन्धित सदस्य अलग रहन्छन्।

मूल्याङ्कनका आधार

विचार
विचारअङ्कभार
प्रश्नको गुणस्तर र मौलिकता३०
काम पूरा गर्ने क्षमता: लेखनको नमुना, विगतको काम, कार्ययोजना३०
फेलोसिपका क्षेत्रसँगको तालमेल२०
स्रोत र विधि२०
कर्म
कर्मअङ्कभार
सम्बन्धित मुद्दाको अनुभव र अदालती क्षमता३५
समुदायसँगको जरा: सेवा पाउने समुदायको विश्वास र पहुँच, भाषा२५
मुद्दा योजनाको गुणस्तर२०
निष्ठा र दबाबमा अडिग रहने क्षमता२०

निबन्ध पुरस्कार: आलोचनाको जोखिम र इमानदारी, तर्क र प्रमाणको बल, र लेखनको गुणस्तर।

१०समयतालिका

  1. आवेदन खुला

    ३० कात्तिक, २०८३ वीरगन्ज

  2. अन्तिम मिति

    १३ पुष, २०८३ । २९ डिसेम्बर, २०२६

  3. छोटो सूची र अन्तर्वार्ता

    माघ २०८३ । जनवरी २०२७

  4. फेलो तथा पुरस्कारको घोषणा र प्रदान

    फागुन २०८३ । फेब्रुअरी २०२७

  5. फेलोसिप अवधि

    फागुन २०८३ देखि १२ महिना

११फेलोका लागि सर्त

  • मानदेय रकम तोकिएका उपलब्धिका आधारमा चार किस्तामा भुक्तानी हुन्छ।
  • विचार फेलोले प्रत्येक तीन महिनामा सम्पादकसँग भेट्छन्, नवौँ महिनाभित्र पूरा मस्यौदा र बाह्रौँ महिनाभित्र तयार पाण्डुलिपि बुझाउँछन्। प्रतिलिपि अधिकार लेखकमै रहन्छ। २४ महिना सम्म पहिलो प्रकाशनको अधिकार प्रदीप गिरि इन्स्टिच्युटसँग रहन्छ।
  • कर्म फेलोले आफ्नो वकालत जारी राख्न सक्छन्, तर डेस्कका लागि हप्तामा कम्तीमा २० घण्टा दिनुपर्छ। सेवाग्राहीले कुनै शुल्क तिर्नुपर्दैन। प्रत्येक मुद्दाको दस्तावेजीकरण सेवाग्राहीको सुसूचित सहमतिमा गरिन्छ, र सेवाग्राहीले आफैँ नचाहेसम्म उनको पहिचान गोप्य राखिन्छ।
  • फेलोका निष्कर्ष र तर्क फेलोकै हुन्। प्रदीप गिरि इन्स्टिच्युट वा नेपाली कांग्रेसले फेलोको निष्कर्षमा हस्तक्षेप गर्ने छैन।
  • साहित्यिक चोरी, झूटा विवरण, डेस्कका सेवाग्राहीबाट शुल्क असुली वा गम्भीर दुराचार भएमा इन्स्टिच्युटले फेलोसिप अन्त्य गर्न सक्छ।

१२तपाईंको जानकारी

तपाईंले पठाएको विवरण छनोटका लागि मात्र प्रयोग हुन्छ। समुदाय र बसोबाससम्बन्धी प्रश्न स्वैच्छिक हुन्, र ती खण्ड ७ को प्राथमिकता नीति लागू गर्न मात्र प्रयोग हुन्छन्। आवेदन सचिवालय र निर्णायक समितिले मात्र हेर्छन्। छनोट नभएका आवेदन १२ महिना पछि नष्ट गरिनेछन्।

१३सम्पर्क

फोन
+९७७-९८४५५२५३७७
प्रधान कार्यालय
मुर्ली-१२, वीरगन्ज, पर्सा, मधेस प्रदेश
मधेस प्रदेश कार्यालय
रामानन्द चोक-१६, जनकपुर, धनुषा
बागमती प्रदेश कार्यालय
बखुण्डोल-२, ललितपुर

उहाँले पढ्नुभयो, ताकि त्यसलाई कर्ममा उतार्न सकियोस्। र, आफूले पढेका कुरामाथि कर्म गर्नुभयो। फेलोसिपले आफ्ना फेलोहरूबाट योभन्दा बढी केही माग्दैन, र योभन्दा कम पनि होइन।

आवेदन आह्वान | पहिलो समूह, २०८३/८४

आवेदन फाराम

तपाईं कुन विधामा आवेदन दिँदै हुनुहुन्छ, छान्नुहोस्। हरेक विधाको छुट्टै फाराम छ।

तपाईं कुन विधामा आवेदन दिँदै हुनुहुन्छ?

फाराम १ | विचार

अनुसन्धान तथा लेखन फेलोसिप | आवेदन फाराम २०८३/८४

* चिह्न भएका विवरण अनिवार्य छन्।

कृपया सबै उत्तर नेपालीमा (देवनागरी लिपिमा) लेख्नुहोस्। इमेल, लिङ्क र प्रकाशित कृतिका शीर्षक भने जस्ताको तस्तै लेख्न सकिन्छ।

क. तपाईंको विवरण

लिङ्ग (अनिवार्य)

ख. प्राथमिकतासम्बन्धी जानकारी (स्वैच्छिक)

प्राथमिकता नीति लागू गर्न मात्र प्रयोग हुन्छ। खाली छोड्दा तपाईंको आवेदनमा कुनै असर पर्दैन।

समुदाय (लागू हुने जतिमा चिह्न लगाउनुहोस्) (ऐच्छिक)
के तपाईं काठमाडौं उपत्यकाबाहिर बसोबास र काम गर्नुहुन्छ? (ऐच्छिक)

ग. शिक्षा र काम

प्रकाशित वा पूरा भएका काम (ऐच्छिक)

बढीमा पाँचवटा लेख्नुहोस्। अप्रकाशित काम पनि मान्य हुन्छ।

पङ्क्ति १

पङ्क्ति २

पङ्क्ति ३

पङ्क्ति ४

पङ्क्ति ५

घ. तपाईंको परियोजना

क्षेत्र (एउटामा चिह्न लगाउनुहोस्) (अनिवार्य)

पाण्डुलिपिजस्तै, नेपाली वा अंग्रेजी जुनसुकैमा लेख्न सकिन्छ।

कामको प्रकार (अनिवार्य)

बढीमा ३०० शब्द।

० / ३०० शब्द

बढीमा ३०० शब्द।

० / ३०० शब्द

बढीमा ३०० शब्द।

० / ३०० शब्द

घ५. बाह्र महिनाको कार्ययोजना (अनिवार्य)

१ देखि ३ महिना

४ देखि ६ महिना

७ देखि ९ महिना

के बुझाउनुहुन्छ

पूरा मस्यौदा

१० देखि १२ महिना

के बुझाउनुहुन्छ

तयार पाण्डुलिपि

ङ. तपाईं नै किन

बढीमा ३०० शब्द।

० / ३०० शब्द

च. सन्दर्भ व्यक्ति

तपाईंको काम चिन्ने दुई जना। नातेदार होइन। इन्स्टिच्युटले उहाँहरूसँग सम्पर्क गर्न सक्छ।

सन्दर्भ व्यक्ति (अनिवार्य)

पङ्क्ति १

पङ्क्ति २

छ. प्रकटीकरण

हो वा छु भन्दैमा तपाईं अयोग्य हुनुहुन्न। निर्णायक समितिलाई यो जानकारी चाहिन्छ।

के तपाईं कुनै पनि तहमा राजनीतिक दल वा सरकारको कुनै पदमा हुनुहुन्छ? (अनिवार्य)
के तपाईं प्रदीप गिरि इन्स्टिच्युटका सञ्चालक, कर्मचारी वा निर्णायक समितिका कुनै सदस्यको नातेदार वा कर्मचारी हुनुहुन्छ? (अनिवार्य)

घोषणा

आजको मिति आफैँ अभिलेख हुन्छ।

तपाईंले पठाएको विवरण छनोटका लागि मात्र प्रयोग हुन्छ।

तपाईंले लेखेका उत्तर यही ब्राउजरमा आफैँ सुरक्षित हुन्छन्, त्यसैले पछि आएर पूरा गर्न सक्नुहुन्छ।

प्रदीप गिरि फेलोसिप: आवेदन खुला भएको छ
आवेदन दिनुहोस्